News and Blogs

Bakterya sa kasilyas at computer keyboard, magkapareha!

UNTV News Service — Fri, 09 May 2008 00:25:00 +0000

Alam niyo ba na posibleng kasingdumi ng kasilyas o toilet ang dumi na tinataglay ng inyong mga ginagamit na computers?

Sa isinagawang survey ng United Kingdom Consumer Watchdog at Publication Group na “Which?”, lumitaw na ang computer keyboards ay nagtataglay ng mga bacteria na karaniwang nakikita sa mga toilet.

Napag-alaman na ang karaniwang sangi ng pagkakaroon ng bacteria sa keyboard ng computer ay ang pagkain sa table na malapit sa keyboard. Ayon sa mga eksperto, ang mga mumo mula sa pagkain ay karaniwang nagiging breeding ground ng milyon-milyong bacteria.

Ang isa pang itinuturong dahilan ng pagkakaroon ng bacteria sa keyboard ay ang hindi paghuhugas ng kamay pagkagaling sa toilet o rest room.

Dahil dito, ipinapayo ng mga dalubhasa na regular na linisin ang keyboard, mouse at monitor ng inyong computer upang maiwasang maging breeding ground ito ng mga bacteria at posibleng magdulot ng pagkakasakit. news.UNTVweb.com

Share This

Nanlilimahid na traffic law enforcer, bawal sa kalsada

UNTV News Service — Fri, 09 May 2008 00:18:33 +0000

Bawal na sa lansangan ang mga “dugyut” na traffic law enforcer.

Ito ang bagong inilabas na direktiba ni MMDA Traffic Dir. Bobby Esquivel upang maging presentable sila at maging respetable sa mga motorista kapag nag-aayos ng daloy ng trapiko.

Laman din ng direktiba ang pagbabawal sa mga enforcers na magsuot ng jacket na tumatakip sa kanilang nameplate.

Umalma naman ang ilang traffic law enforcer sa pagbabawal sa kanila ng pagsusuot ng jacket dahil ito umano ang kanilang proteksyon sa matinding init o ulan. news.UNTVweb.com

Share This

53 paaralan sa NCR magtataas ng singil sa matrikula

UNTV News Service — Fri, 09 May 2008 00:14:57 +0000

Inaasahang dadagsa ang mga mag-aaral sa mga pampublikong eskwelahan sa elementarya at hayskul dahil sa paglipat ng mga ito mula sa mga pribadong paaralan bunsod ng mataas na tuition fee.

Ito ang naging pahayag ng DepEd bunsod na rin ng isinampang petisyon ng 53 private schools sa National Capital Region para sa tuition fee increase sa darating na pasukan.

Ayon sa DepEd-NCR papayagan ang isang paaralan na magtaas ng singil sa matrikula kung mapupunta ito sa paga-upgrade ng kagamitan at dagdag sahod sa mga guro. Sa Mayo 15 ang deadline ng paghahain ng petisyon.

Karaniwan nang problema ng gobyerno ang kakulangan sa guro at sa classrooms sa mga pampublikong paaralan tuwing magsisimula ang pasukan. news.UNTVweb.com

Share This

Gobyerno, magiipon ng bigas para sa tag-ulan

UNTV News Service — Fri, 09 May 2008 00:10:33 +0000

Ipagpapatuloy ng gobyerno ang agresibong pagbili ng mga bigas upang maparami ang stock ng bigas bago pa man magsimula ang panahon ng tag-ulan.

Ayon kay National Food Authority Administrator Jessup Navarro, mayroong buffer stock na 770,000 tons at 1.7 million tons na nakakontratang aangkatin, ang sasagot sa pangangailangan ng bansa sa susunod na animnapu’t araw na matatapat sa lean months ng pagtatanim ng bigas.

Pero aniya, kailangan pang bumili ng mula limangdaan hanggang pitong daang libong tonelada ng bigas bilang paghahanda sa typhoon season.

Magkagayunman, patuloy ang pagbili ng imported na bigas para masigurong may mabibiling sapat na bigas sa merkado sa kabila ng krisis na nararanasan. news.UNTVweb.com

Share This

Panay island, may krisis sa enerhiya

UNTV News Service — Thu, 08 May 2008 23:58:04 +0000

Nagsisimula na ang krisis sa enerhiya sa ilang bahagi ng bansa.

Inamin ito ng Department of Energy matapos na makumpirmang lumalala na ang nasabing krisis sa mga isla ng Panay at Negros.

Nakararanas umano ang mga residente sa nasabing lugar ng apat hanggang limang oras na brownout araw-araw.

Bunsod umano ito ng lumalaking demand ng kuryente sa naturang lugar kung kaya’t pinapayuhan ang mga residente doon na magtipid sa paggamit ng kuryente. news.UNTVweb.com

Share This

Power rate investigation sa Kamara, tinututulan ng Palasyo

UNTV News Service — Thu, 08 May 2008 23:50:46 +0000

Hindi naman sang-ayon ang Malakanyang sa isasagawang pagdinig ng Kongreso hinggil sa mataas na singil sa kuryente.

Mas mabuti umano na gawin ang pagdinig sa Energy Regulatory Commission.

Gayunpaman, karapatan umano ng Kongreso na magsagawa ng imbestigasyon ukol sa nasabing isyu. news.UNTVweb.com

Share This

Kuya Daniel Razon, pwedeng pumunta sa Apalit kahit idineklarang persona-non-grata ayon sa Konstitusyon

UNTV News Service — Wed, 07 May 2008 00:31:03 +0000

Hindi maaaring pagbawalan ninuman ang isang tao na tumuntong sa isang lugar kung saan siya idineklarang persona-non-grata.

Ayon kay Chief State Prosecutor Jovensito Zunio ng DOJ, maaaring mag-iba ang trato ng mga opisyal ng lokal na pamahalaan na nagdeklara ng persona-non-grata sa isang tao. Subalit, hindi nila umano maaaring alisan ito ng karapatan at pagbawalang patuloy na manirahan sa naturang bayan.

Matatandaang kamakailan ay idineklara ng Pamunuan ng Bayan ng Apalit na persona-non-grata si Mr. Public Service Daniel Razon sa bayan ng Apalit.

Paniwala ni Zunio, masyado na lamang pinersonal ng lokal na pamahalaan ng Apalit si Razon.

“Ibig sabihin ng Persona-non-grata, he is parang unwanted in that place pero indi naman ibig sabihin na he is banned from that place. That is his constitutional right to move around,” pahayag ni Zunio.

“Wala namang hard and fast rule on use of the term Persona-non-grata, not even in law. It’s not a commonly used term,” dagdag pa niya. news.UNTVweb.com

Share This

May-ari ng motorsiklo na ginamit ng D’ X-MAN host killers, tukoy na ng pulisya

UNTV News Service — Wed, 07 May 2008 00:22:37 +0000

Nakilala na ng Task Force Mataro ang mga suspek sa pagpatay sa D’ X-MAN host na si Marcos Mataro.

Ayon sa ulat ng Task Force Mataro, isang Alias Nickson Icao ang nagmamay-ari ng motorsiklo na ipinahiram niya sa isang Ka Zaldy o Felizardo Lumagham - diakono ng Iglesia ni Cristo o INC.

Nabigo ang mga operatiba ng Task Force na arestuhin ang mga suspek dahil nakaalis na ito sa kanilang lugar sa Sitio Danga, Brgy. Colgante, Apalit, Pampanga. Nabatid sa mga impormante na pati ang pamilya ng dalawang suspek ay wala na rin sa tinitirhan ng mga ito. news.UNTVweb.com

Share This

Mga pumasang examinees ng NLE, bibigyan ng certificate

UNTV News Service — Wed, 07 May 2008 00:18:26 +0000

Sa araw na ito ay sisimulan na ng Department of Labor and Employment (DoLE) ang pag-iisyu ng mga Certificate sa mga pumasang examinees sa nakaraang voluntary retake examination ng tests III at V ng June 2006 Nursing Licensure Exams.

Ayon kay Labor and Employment Sec. Marianito Roque, mula alas-9 ng umaga ganggang tanghali at mula 1:30 hanggang 4:30 ng hapon maaaring makuha ng mga pumasang examinee ang kanilang certificate sa Office of the Secretary ng DoLE sa Intramuros, Maynila o sa Regional Offices nito.

Huwag kalimutag dalhin ang inyong Professional Regulation Commission License.

Ang iskedyul ng pagre-release ng individual certificates ay ang mga sumusunod: May 7, 2008 - Abad – Bendo; May 8, 2008 - Bergado – Dayawon; May 9, 2008 - De Guzman – Ganay; May 12, 2008 - Gantang Co – Luna; May 13, 2008 - Lusis – Paderes; May 14, 2008 - Padilla – Saloria; May 15, 2008 - Samia – Zolina. news.UNTVweb.com

Share This

Appointment ng mga opisyal ng militar, aprubado na ni GMA

UNTV News Service — Wed, 07 May 2008 00:10:12 +0000

Inaprubahan na ni Pangulong Arroyo ang Appointment ng anim na opisyal ng militar na uupo sa maseselang posisyon sa organisasyon.

Kaugnay ito ng nalalapit na pagreretiro ni AFP Chief of Staff Hermogenes Esperon Jr. sa Mayo 2 na papalitan naman ni Lt. Gen. Alexander Yano.

Ang mga opisyal na nabigyan ng panibagong posisyon sa militar ay si Lt. Gen. Rodolfo Maclang bilang Deputy Chief of Staff; Lt. General Victor Ibrado bilang Commanding General ng Philippine Army; Lt. General Pedro “Ike” Inserto bilang Commander ng AFP Central Command; si Maj. Gen. Amado Cunanan naman bilang Commander ng Eastern Mindanao Command at si Maj. Gen. Isagani Cachuela bilang Commander ng Northern Luzon Command. news.UNTVweb.com

Share This